رودى

ابنتى العزيزة رودى ....
تحياتى وحبى ليكى .. يا اجمل بنوته فى الدنيا كلها .. ان شاء الله
احب اطمنك انك هايكون ليكى اب .. هايحبك اكتر من مامتك
هاتكونى نور عيونه .. وكل حاجة ليه .. 
هاساعدك فى دروسك .. وهاكون دايما جمبك .. 

ويوم اجازتك هاخدك فى عربيتى .. اللى من الواضح انى لسة مشترتهاش
وهانخرج نتفسح فى المكان اللى انتى تختارية ..
وهاناكل فشاار ونضرب كشرى من اى بياع فى الشارع
وطبعا مش هانقول لماما علشان هاتزعل لو عرفت اننا اكلنا من البياعين دول
كمان فى الاجازة هانروح انا وانتى وماما لاى مكان نصيف
هاخليكى احسن بنوته .. وهاجيلك دايما المدرسة .. علشان تعرفينى ع الانتيمه بتاعتك
ووقت الصلاه هاصلى بيكم انتى وماما .. وهاحاول احفظك القرآن اللى تقريبا انا مش حافظة كله
بس انتى لازم تبقى احسن من بابا .. وتحفظية كله .. او نبقى نتسابق اللى يحفظ اكتر
كمان هاجيبلك طرح كتيير جداا بكل الالوان .. علشان تتباهى بحجابك وانتى ماشية
يااااااااااه ع كمية اللعب الى هاشتريها لحبيبتى رودى
وهاجيبلك عروسة صغيرة تسميها رودى على اسمك ..
وتأكليها وتنيميها فى سريرها اللى هايكون جمب سريرك
ولما تكبرى هاتبقى صاحبتى .. هانحكى كتير اوى ... وهاتقوليلى ع اللى مضايقك
وكمان لو لقيتك بتتكلمى فى التليفون مش هاسالك بتكلمى مين
لانى اكيد هاكون واثق فى بنوتى حبيبتى ..
ربنا يطول فى عمرى كمان لغاية ماشوفك عروسة .. ولابسة فستان ابيض ..
واسلمك لعريسك اللى انتى اختارتية وحبتية .. واهمسله وانا بسلمك لايدة واقوله
انت مش اول حب فى حياتها .... لانى انا حبيتها قبلك .. خلى بالك منها


بقلم : محمد صادق
مقتبسات من حياه بنى ادم لـ محمد صادق